Rania
اتمني انكم تنشروا حكايتي الخاصة بالاجهاض
انا ام مصرية عندي ٣٥ سنة متجوزة و عندي بنتين حياتي مع زوجي كاي بيت مصري عبارة عن مجموعة من التحديات علشان نعيش في مستوي كويس و نعلم ولادنا تعليم كويس احنا الاتنين بنشتغل و مقضينها جمعيات واقساط ، انا شايلة العبء الاكبر من المصاريف سواء في البيت او التعليم لان مرتبي كبير انا رافضة تماما اني اجيب طفل تالت لان احنا بالعافية قادرين نعيش حاليا وكل املي في الحياة اني اربي بناتي التربية الصحيحة جوزي ماشي مع مبدأ كل عيل بيجي برزقه و الكلام دة غلط مليون في المية مصر مليانة اطفال مش لاقين ياكلوا و بيشحتوا في الشوارع و الاشارات
من ساعة ماجبت بنتي التانية وانا كنت ماشية علي حبوب منع حمل لان اللوب مانفعش معايا و الدكتور نصحني بنوع معين من الحبوب ولاسباب مجهولة تماما بالنسبة لي في اخر سنتين بقينا بنلاقي الحبوب دي بصعوبة شديدة ، الحبوب اللي زمان كانت بتتوزع ببلاش تقريبا مرة واحدة اختفت و بنتحايل علي الصيدليات يشفولنا علبة باي طريقة و غالبا بيجيبو نوع مش اللي انا متعودة عليه ، كانت نتيجة دة للاسف ان انا بقيت حامل و الكوميديا السوداء اني لما جيت اشتري اخنبار حمل علشان اتاكد قالولي ان هو كمان شاحح في السوق
في بلد زي مصر اللي الرئيس بيطلع في كل مكان يشتكي من الزيادة السكانية و اعباء الدعم واحنا اساسا مش لاقين حتي حبوب منع الحمل ولا حد دريان بينا اساسا ولا بيتكلم في المشكلة و لا بيحاول يلاقيلها حلول
طبعا دي كانت اكبر صدمة في حياتي عرفت الخبر واتاكدت و ماقولتش لاي مخلوق في الدنيا قعدت يومين تقريبا ما بانامش كل اللي بافكر فيه اعمل ايه احتفظ بالطفل ؟ طب و شغلي و كل المسئوليات اللي عليا من جمعيات و مصاريف و خلافه اللي مرتب جوزي لوحده مايشيلش حتي ربعها اجيب طفل و اخد اجازة ٣ شهور فقط و بعدين اوديه حضانة ! حسيت الدنيا حواليا كلها بتنهار وكل اللي بافكر فيه واخططه لاولادي بيبوظ وكل اللي فكرت فيه فليخشي اللذين تركوا من خلفهم ذرية ضعافا
حسيت ان دي مشكلتي لوحدي و ان انا اللي لازم اتصرف فيها دة جسمي انا و حياتي انا و لازم الاقي حل استخرت ربنا و قررت ان الحل الوحيد اني انزل الحمل دة خصوص ان الحمل لما عرفت كان عمره اقل من اسبوعين ، ماكنتش عايزة اروح لدكتور لاني ما اعرفش دكتور بيعمل العمليات من النوع دة و مش عايزة اقول لحد و لا حتي امي ، مش عايزة حد يتدخل ولا يحاول يقنعني ، ابتديت ادور علي وصفات شعبية زي مشروبات معينة او مجهود او او بس للاسف كلها فشلت تماما لغاية ماعرفت ان فيه حبوب للاجهاض طبعا بتتباع بشكل غير شرعي فانا خفت جدا اني حتي احاول اشتريها ، بالصدفة البحتة عرفت ان الوقغ بتاعكوا و ان انتوا بتساعدوا النساء ان هما يقوموا باجهاض امن في المنزل عن طريق الحبوب و دي كانت بارقة الامل اللي تمسكت بيها وفعلا دخلت الموقع بتاعهم و عملت تسجيل عليه وفوجئت ان هما بيطلبوا تبرع بمبلغ ٩٠ يورو طبعا بالنسبة لنا كمصرين دة مبلغ كبير ابتديت اتواصل معاهم عن طريق الايميل و ووافقوا انهم يخفضوا المبلغ ل٢٠ يورو وفعلا دفعتهم عن طريق الفيزا و طلبت يبعتولي الحبوب علي عنوان الشغل فوجئت بعدها ان طبيب اتواصل معايا عن طريق الايميل و قالي كل التعليمات وكل اللي محتاجاه و عوامل الامان اللي المفروض اتبعها و امتي ممكن احتاج اروح مستشفي و ممكن اقول ايه ساعتها لان للاسف الاجهاض في بلدنا غير قانوني وممكن اتعرض للحبس وفعلا بعدها بحوالي ٣ او ٤ ايام استلمت الحبوب ماكنتش متخيلة ان الموضوع حيبقي بالسهولة دي وكان خوفي الوحيد ساعتها ان تطلع فيه خدعة في الموضوع او ان الحبوب ماتشغلش او تعمل اي تاثير سئ اخدت اجازة من الشغل و اشتريت المسكنات و الفوط الصحية زي ما الطبيب نصحني وابتديت اخد الدوا بالطريقة اللي وصفوهالي ولمدة ساعة ماحصلش اي حاجة كانت اطول ساعة في حياتي عشتها في رعب لا يوصف وبعدها الحمدلله ابتدي النزيف وابتدت معاها الام لا توصف اسوأ من الام الولادة لدرجة اني غبت عن الوعي لدقائق وتقريبا اخدت شريط المسكن بالكامل ، الحمدلله حسيت بعدها براحة شديدة برغم الالام و النزيف وبحكم اندفاع الهرمونات كنت بابكي كتيييير جدا كنت بادخل الحمام و ابكي لاوقات طويلة بس كنت حاسة بالراحة و القوة اني قدرت اتحكم في مصير ي بنفسي واكتر حاجةعرفتني اني اخدت القرار الصحيح هو ان زوجي ماحسش بيا نهائي برغم الحزن والالام و التعب و النزيف وعدم النوم هو ماحسش حتي ان فيه حاجة غلط طالما بياكل و بيشرب وانا باصرف علي البيت زي ما انا متعودة و متحملة مسئولية الاطفال يبقي كله تمام و مافيش خاجة غلط
بعد اكتر من عشر سنين زواج احنا فعليا كل واحد عايش في دوامته ، القصة دي حصلت من سنتين تقريبا و الي الان مافيش اي حد في الدنيا يعرف حاجة عنها و اول مرة احكيها وماحسيتش بالندم لحظة اني عملت كدة بالعكس انا شايفة اني اتخذت القرار الصحيح تماما و الدرس اللي اتعلمته اني اخد احتياطاتي اكتر من كدة في سبيلاني ما اتعرضش للتجربة دي مرة تانية
حبيت اوضح للناس ان مش كل اللي عايز حقه في الاجهاض بنات سيئة من وجهة نطرهم او مشي بطال زي مابيحبوا يوصفوها لا فيه سيدات متزوجات كتير مش حابين يبقي عندهم اطفال و بيستخدموا وسائل لمنع الحمل بس ممكن ظروف خارجة عن ارادتهم تحطهم في الموقف دة ساعتها لازم يلاقوا الدعم ولازم يلاقوا حلول وبدايل مش صح اني اجيب طفل بدون ارادتي و مش صح ان حد يتحكم في جسمي و في حياتي كلنا عارفين الحلال و الحرام وربنا وحده اللي حيحاسبنا واي انسان بالغ عاقل من حقه انه ياخد قرارات تخصه بكامل ارادته و يتحمل مسئولياتها الكاملة ن
علي فكرة الي الان ادوية منع الحمل مش متوفرة و الوضع بقي اسوأ بعد التعويم و زيادة سعر الدولار و لسة بنحتاج نلف علي صيدليات مصر كلها علشان نلاقي شريط
2015 Египет